მონაწილეობის სხვა ფორმები საქართველოს კანონის მიხედვით „ადგილობრივი თვითმმართველობის შესახებ“
აქტიურ მოქალაქეს შეუძლია სხვადასხვა გზით ჩაერთოს გადაწყვეტილების მიღების პროცესში. მართალია, საბოლოო გადაწყვეტილებას სახელისუფლებო ორგანოები იღებენ, თუმცა მოქალაქეები, დიალოგის საშუალებით, აწვდიან სახელმწიფო ან ადგილობრივ ინსტიტუტებს მოსაზრებებს, ალტერნატივებსა და მიმართულებებს. ანუ მოქალაქეები, გარკვეულ გავლენას ახდენენ საბოლოო გადაწყვეტილების მიღებაზე.
ადგილობრივი თვითმმართველობის კოდექსი (მუხლი 85) მოქალაქეს საზოგადოებრივი ჩართულობის სხვადასხვა ფორმას სთავაზობს. ესენია:
ა) “დასახლების საერთო კრება” – იგი წარმოადგენს ადგილობრივი მოსახლეობის მსჯელობას მათთვის მნიშვნელოვან სოციალურ და ეკონომიკურ საკითხებზე და შესაბამისი წინადადებების მომზადებას მუნიციპალიტეტის ორგანოებში წარსადგენად;
ბ) “პეტიცია” – ნორმატიული ადმინისტრაციულ-სამართლებრივი აქტის პროექტია, რომლის შეტანის უფლება აქვს მუნიციპალიტეტის ტერიტორიაზე რეგისტრირებულ მოსახლეობას.
გ) “სამოქალაქო მრჩეველთა საბჭო” – მუნიციპალიტეტის მერის / რაიონის გამგებლის სათათბირო ორგანოა, რომლის შემადგენლობაში შედიან მეწარმე იურიდიული პირების, არასამთავრობო ორგანიზაციებისა და მუნიციპალიტეტის მოსახლეობის წარმომადგენლები. მრჩეველთა საბჭოს განსახილველად წარედგინება მუნიციპალიტეტის ბიუჯეტის პროექტი და სხვა მნიშვნელოვანი ადმინისტრაციულ-სამართლებრივი აქტების პროექტები, ინფრასტრუქტურული და სოციალური პროექტები;
დ) მუნიციპალიტეტის საკრებულოსა და მუნიციპალიტეტის საკრებულოს კომისიის სხდომებში მონაწილეობა – ამ სხდომებში მონაწილეობა თავისუფალია ნებისმიერი მსურველისთვის. დამსწრენი უშუალოდ პირველი პირისგან იღებენ ინფორმაციას;
