“თანამონაწილეობითი დაგეგმარების” დროს ხდება ობიექტის პოტენციური მომხმარებლების და მოსახლეობის საჭიროებების და მოლოდინების მაქსიმალური დაზუსტება და მათი გათვალისწინება პროექტის დეტალურ დონეზე, რაც უზრუნველყოფს მოსახლეობის მოლოდინების გამართლებას.

ასეთი მეთოდის გამოყენება ორიენტირებულია შედეგზე და უზრუნველყოფს თითოეული ჯგუფის ინტერესების გათვალისწინებას პროექტის განხორციელების ყველა სტადიაზე.

“თანამონაწილეობითი დაგეგმარების” მეთოდი გულისხმობს ნებისმიერი სახის პროექტებს, რომლებიც მომხმარებლის ჩართულობისა და გამოკითხვის საშუალებით ითვალისწინებს და ერგება დაინტერესებული მხარის საჭიროებებს, მაშინაც კი თუ ასეთი პოტენციური მომხმარებელი მხოლოდ ერთი ადამიანი, ან ადამიანთა ჯგუფია.

ძირითად შემთხვევაში “თანამონაწილეობითი დაგეგმარება” გამოიყენება საზოგადოებრივი სარგებლობის ობიექტების დაგეგმარების და რეკონსტრუქციისას მაშინ, როდესაც ხდება რამდენიმე ფუნქციისა და სოციალური ჯგუფის ინტერესთა გადაკვეთა.

ეს მეთოდი შეიძლება გამოყენებულ იქნას ნებისმიერი პროექტისთვის, როდესაც რამდენიმე ფუნქციისა და სოციალური ჯგუფის ინტერესები იკვეთება. კერძოდ, იგი გამოიყენება და კარგად მუშაობს საზოგადოებრივი სივრცეების დაგეგმვაში. მაგალითად, პარკებში, მაგრამ ასევე შეიძლება გამოყენებულ იქნას განვითარების გეგმებისას და საზოგადოებრივ სერვისებში.

განხორციელება შეიძლება ყველა მუნიციპალიტეტსა და ყველა დასახლებულ პუნქტში, იქნება ეს ქალაქი, რაიონული ცენტრი, სოფელი, დაბა თუ სხვა ტიპის დასახლება.

მაგალითებს შეგიძლიათ გაეცნოთ ოზურგეთისა და მარნეულის მუნიციპალიტეტებში.

“თანამონაწილეობითი დაგეგმარება” შინაარსობრივად დემოკრატიული პროცესია, რომელშიც გადაწყვეტილებების მიღების დროს თითოეულ მონაწილეს აქვს ხმის უფლება. საბოლოო გადაწყვეტილება შემუშავებულია მოსახლეობის მიერ.

ადამიანთა ხმების მნიშვნელობა არ განისაზღვრება საზოგადოებრივი, სოციალური და თანამდებობრივი სტატუსის მიხედვით. შესაძლებელია გათვალისწინებული იყოს პრიორიტეტული სოციალური ჯგუფები, როგორიცაა ბავშვები, ხანდაზმულები და შშმ პირები.

“თანამონაწილეობითი დაგეგმარება” კომპლექსური პროცესია და შესაბამის ცოდნასა და გამოცდილებას მოითხოვს. თუმცა მოსახლეობის მინიმალური ჩართულობის უზრუნველსაყოფად შესაძლებელია მისი განხორციელება დამატებითი ბიუჯეტის გარეშეც.

მინიმალური ჩართულობა შესაძლებელია იყოს მოსახლეობის გამოკითხვა, ან ესკიზური პროექტის საჯარო პრეზენტაცია.

ნებისმიერი ინვესტიციის მიზანია წარმატებული ექსპლუატაცია, ხოლო საზოგადოებრივი სივრცეების წარმატებულობა პირდაპირპროპორციულია იმასთან,  თუ რამდენადაა სივრცე დატვირთული და აქტიური. პოტენციური მომხმარებლების გამოკითხვა და ჩართვა პროცესებში, სამომავლოდ, მათი აქტივობისთვის საუკეთესო გარანტიაა.

“თანამონაწილეობითი დაგეგმარება” არის კანონიერი პროცესი. უფრო მეტიც, მოსახლეობის ჩართულობის უზრუნველყოფას ევროკავშირი & საქართველოს ასოცირების ხელშეკრულების ვალდებულებებიც ითვალისწინებს.

“თანამონაწილეობითი დაგეგმარების” ღირებულება დამოკიდებულია პროექტის მასშტაბზე, ფუნქციაზე და მოსახლეობის რაოდენობაზე, რომელზეც ეს პროექტი გავლენას ახდენს. მისი ღირებულება იანგარიშება პროცესებში ჩართული პირების სამუშაო დროის, მოსახლეობასთან შეხვედრების სავალდებულო რაოდენობით, ტექნიკური საჭიროებებისა და საინფორმაციო კამპანიის რესურსის მიხედვით.

“თანამონაწილეობითი დაგეგმარების” განსახორციელებლად აუცილებელია არქიტექტორი / ლანდშტაფის დიზაინერი და სამუშაოების ღირებულების შემფასებელი, ანუ ადამიანი, რომელიც დაითვლის მომავალი სამუშაოების ღირებულებას.

კანონმდებლობით ვადები გაწერილი არ არის. პრაქტიკიდან გამომდინარე კი “თანამონაწილეობითი დაგეგმარების” განსახორციელებლად  საკმარისია სამი თვიდან ექვს თვემდე. ანუ პროექტის პრაქტიკული შესრულების დაწყებამდე და უნდა დასრულდეს წლის ბიუჯეტის დამტკიცებამდე, რათა არ გახდეს საჭირო ბიუჯეტის ცვლილება.